چی قهوه اینوشمت هرچندغلیظی       موتونه ترک نیکنم چون سیم خیلی عزیزی

چی شکارتیرخرده ای پا به فرارم         مرحم زخمم خوتی بیو وادیاروم

کاشکی کوگی بیدوم تابال بزیدوم     وار به وار دیندات بویدوم هی سیت بخوندوم

چی چویل باد ایبروم مابین گینه     نکنه ترکم کنی دشمن بوینه

چه کنم به روزگارغمش مونه پیر کرد       تاریکی وند به دلم تونه زمو دیر کرد

سرقلبم چه بنویسم که قلم گیر نکنه   سی خداموچه کنم تا تونه وم دیر نکنه

هم گلی هم بلبلی هم سوتیامی    حلا که زنگ نیزنی بده پیامی

هرساکه پیام نیدی دلم ایبوتنگ ،نکنه ناراحتی وم نیزنی زنگ،ار دنیانه وم بدن  واهرچی که داره،ارزش ناراحتی تونه نداره

شال به  قد چوقا به ور،تفنگ به شونم        عشق تو عشق ولات،تش زیدبه جونم

چه خووه مال بارکنه  ایلم به باربو        دستمال دور گردنم دستمال یاربو

مین باغ زندگیم توچی بهاری      مواسیر عشقتم توخبر نداری

سالاربلندفدی برده حواسم  موتونه ترک نیکنم دوست باکلاسم

یه گلی مین روزگارکردمه گرفتار   نه تروم ترکش کنم ،نه  وام ایبوه یار

قدبلندتیادرشت هیکل خانی     غم دنیانه نخوری تامونه داری

  مه اول،افتو دوم،توسومینی     مه که رهد،افتونشست،خوت دل نشینی

لچکت پاره بکن مینات بزن تش     توکه یادم نیکنی به کی دل کنم خش

دنیانه سندکنم به نامت     هرچندناقابله پیشکش مرامت 

سرشوبال چاله دل کرده هواته           بی وفا سیم بفرست عکس تیاته

کوگ بال اشکندتم درمون دردم تی تونه       دل به کس خش نیکنم فکر وخیالم تی تونه

آرمون مند به دلم تیات بووسم    شو وروز زداغت چی تش ایسوسم

موبه شوق دیدنت چی کوگ مستم    یاد اوروزا به خیر تیت اینشستم

قربون تیاقشنگت ای گل نازم          مو ،مین ایل فقط به تواینازم

چی چویل دم برف دلم نیا بچینمت        چی کوگ کوه سفید دلم ایخوبوینمت

جورچویل چه خوش بویی  جورکلوس چه زالی         نازلوطایفه ای عزیزمالی

چه کنم خرسام هیچ نیکنن بند         دیری توچندزردکوه غم به دلم وند

یه گلی سیت بچینم خوش رنگ وخوشبو        مهربون وبامرام مثل خوت بو

نفس بادصباسی خوم وخوت،خوشی وگشت وصفا سی خوم وخوت،بدی ورنج وعزا سی دشمنت ،بهترین روزخداسی خوم وخوت

زتیام عزیزتری بیشتر زجونم        اربخوم ترکت کنم لال بازبونم

مال گل بارون گرهد هیچ نیکنه سا         مودلم سی دیدنت هیچ نیگره جا

گوشیت طلا گروم چون خوش پیامی    هم ستین دلمی هم سوتیامی

دم صو دم پسین نیری زویروم      تومین خیالمی تا که بمیروم

موزشوتادم صو هی گوش به زنگم   بی وفا یادی بکن زدل تنگم

غریوی بد دردیه دلم ایبو تنگ      مر زویرت رهدمه بم نیزنی زنگ

یه دردی مین دلم هردم زنه جوش       یاد توزخاطرم هیچ نیبو فراموش

اس ام اس سیت فرسنم به هردیاری       توکوگ نازمونی مین بختیاری

مل گرگ مهره تیه دعاخومونی    جلدگروم اوسی کنم سی یارجونی

پیام سرپیام دلم کنه شاد   زتیام  عزیزتری که زمو کنی یاد

دلم گو سیش بفرست پیام کوتاه  بنویس  تاتونیایی دل نیگره جا   نوشتم واخین دل سیت پیامی    چه بخوایی چه نخوایی نورتیامی

توبگووبخندهیچ نخوری غم       موتونه خیلی ایخوم  توخاطرت جمع

سربکش مین دلم واقلب پاکم  نبینم  ناراحتی مر موزیر خاکم

پیامی سیت نویسم وادل تنگم     همیشه به یادتم  ای گل قشنگم

به خیالت نره مو زت دیروم   پازمهرت نیبرم بسا بمیرم

چی مرده که خاک کنن سرش ،سرش بنن سنگ      نه یکی یادم کنه  نه وم زنه زنگ

قلیونی سیت چاق کنم بادوسیب خالص    دامش دست تیه کال تاسیت بیارش

آسمون اور گره رهانه بسته    بازدل کم طاقتم یادتو وسته

پیامات چی فصل بهاردلم کنن شاد      فکرنکن نیبینمت  زت نیکنم یاد

تش نهادگوشه دلم پیام دوشی   توکه هیچ زنگ نیزنی په سیچنته گوشی

سربنم  به زردکوه چی کوگ بی دا    چه کنم باورکنی سیت نیگروم جا

اربروم صدسال نیام دلم واباته   توفقط درخواست بده جونم فداته

هیچ دلی چی دل موتنگ واسیر نی    هرچی زنگ ایزنم امکان پذیرنی

مودلم هرروز پسین گره خیالت   دو کلام سیم بنویس  چطوره حالت

چی کلوس دم برف مندیربهارم    عزیزمین دلم کی ایایی وادیارم

توچویل سرحدی موبرف پارم    به خداسی دیدنت خیلی بی قرارم